Чэлэн буҕ ңөнмирбэн Балданңа төрэн инэңидьин үрэлдэрэп! Мүт һүпкүчэклэт эври мӣр 14дүн эрэк инэңидү āнипча«ТОК-шоу» гэрбэ эвин ōрин. Эдү эгдьэн класс һүркэрни ӣлдэритэн: Захаров Леня (8 кл), Захаров Артур (9 кл), Степанов Гриша (10 кл), Алаганчаков Сергей (11 кл). Эвим тӣмңэ 9 кл нōд асатканни Кузьмина Милена бисин.

Эрэк эвин НВКла ōри интеллектуальнай эвим дьōңиникан ōпча. «ТОК» гэрбэ тулмачанни – таңни, ōли, кӣмни. Эдү ньүңэн һāни (тур) бисин. Нонап һāни «Гөбэм чакли» гэрбэ бисин: куңал буквалдук төрэрбү ōннатан, тарич гөбэм (предложениев) чаканнатан, гөмкэн (пословица, выражение) һиэдэн. Гиа һāни «Эрэк ңӣ?» гэрбэ бисин: куңарап фотографияч эвэн дукамңаван һāнмай (эрэкП.А.Ламутскай куңарапан бисин). Или һāни «Гāдаталбу бакли» гэрбэ: таду һүпкүттил һāри темавур һинманнатан ниан гāдаталбу (паралбу) баканнатан. Эррэчэн темал биситэн: фольклор, культура, төрэнниан литература, топонимика. Фольклор темадун – эвэди жанралбу ньучидич тулмачанмай; культура – оран гиакилбан (разновидности) һāнмай; төрэн ниан литература – кинигэ авторбан баканмай; топонимика - Һэвэн-Көлү эрэли биси окатални ниан төрэлни гэрбэлтэн мулгумутан һāнмай. Диҕи һāни «Адьит баргум бакли» гэрбэ: эвимңэлдү өмэтэл үлгимин бөптин ниан баргум диҕэн вариандук һинманмай. Үлгимир эвэн ңөнминни материальнай культурадукун биситэн: һурка, мука, чōңалкачāк дьүҕүлин. Тунңи һāни «Мэргэми гөли», куңалду үлгимин бөптин: Тāтта– эрэк ньока культуран һопканни, һōйа ньока дукамңални ниан культура бэйэңэлни элэ балдача бичэл. Ўнувкалда, иами эчин гөнчэдьир: «Һэвэн эвэсэлдү – эрэк ньокалду Тāтта эрин»? Ньүңи һāни – «Марафон»: эмэпчэ дьөр эгдьэн баллалкан куңаду миатал үлгимин бөптин, ноңартан таду һинмач бараҕаннатан.

Эвин ньөвэнни эррэчэн: 3 местэвАлаганчаков Сергей (11 кл) гарин, 2 местэ – Степанов Гриша (10 кл), 1 местэ– ньөңгэндьэкэн Захаров Артур (9 кл). Эвимңэл бэкэттүтэн āнин (кинигэ) бөптин ниан далси приз. Таррачан āнин тӣмңэдү ниан бөптин. Захаров Леня утешительнай āним гарин.